Hollendingurinn Erik ten Hag, stjóri Manchester United, var brattur í gær þrátt fyrir að liðið hafi tapað á heimavelli gegn Fulham.
United hefur nú tapað á Old Trafford gegn liðum á borð við Crystal Palace, Brighton, Fulham og Bournemouth á þessari leiktíð.
Fyrir leikinn í gær hafði United unnið sex af síðustu sjö leikjum sínum og verið taplaust á þessu ári.
„Við erum klárlega á réttri leið hér hjá Manchester United," sagði Ten Hag.
„Þegar við erum með alla menn heila og tilbúna í slaginn, þá erum við með góðan leikmannahóp. Við sýndum stóran karakter (í gær), við reyndum að vinna og áttum að nýta tækifærin."
Meiðslalisti United hefur verið langur á þessari leiktíð en Luke Shaw, sem var búinn að missa af stórum hluta tímabils, meiddist aftur gegn Luton og þá er Rasmus Höjlund frá í nokkrar vikur.
Lisandro Martinez meiddist illa gegn West Ham á dögunum og þá hafa leikmenn eins og Mason Mount og Tyrell Malacia verið lengi frá. Ennþá eru nokkrar vikur í Aaron Wan-Bissaka einnig.
