„Okkar versti leikur og við höfum varla átt svona off-frammistöðu í allt sumar, sem sést í skori leiksins. Kannski eðilegt enda gáfum við allt í leikinn á föstudaginn," segir Davíð Smári Lamude eftir 4-1 tap sinna manna í Vestra gegn Víkingi í kvöld.
Lestu um leikinn: Víkingur R. 4 - 1 Vestri
Vestri lenti snemma 2-0 undir í leiknum og ljóst var frá upphafi leiks hvert stigin þrjú myndu fara.
„Víkingur átti samt heldur ekki sinn besta leik. Öll mörkin sem þeir skora eru gjafir af okkar hálfu. Við vorum seinir að stíga upp og gáfum þeim alltof mikið pláss. Þeir fundu hálfsvæðin okkar eins oft og þeir vildu,"
Vestri gerði þrefalda skiptingu í hálfleik og var því alveg ljóst að Davíð var ekki sáttur með frammistöðu sinna manna.
„Okkur vantaði orku inn í leikinn. Færslunar voru hægar og við stigum hægt upp. Við vorum lengi að koma okkur aftur í stöðu þegar við töpuðum boltanum og við þurftum að finna einshversstaðar orku. Við áttum frábæra innkomu frá Birki Eydal sem hefur verið meiddur í allt sumar og það er það jákvæðasta sem við tökum út úr þessum leik.
Birkir Eydal, 25 ára Vestfirðingur, skoraði mark Vestra en þetta var hans fyrsti leikur í efstu deild.
„Hann er bara gríðarlega vinnusamur og ofboðslega góð manneskja og getur alveg klárlega hjálpað þessu Vestraliði. Hann skoraði glæsilegt mark og stóð sig vel í leik sem hann meiddist í á undirbúninstímabilinu. Arnór Borg er líka að koma til baka þannig það eru jákvæðir hlutir í þessu."
Vestri fær KR í heimsókn í næsta leik. Fyrsti leikur Vestra á Ísafirði sem bikarmeistarar.
„Við tökum þennan leik í dag og hendum honum í ruslið. Auðvitað verðum við að bera virðingu fyrir því sem við höfum gert á þessum tímabili. Við höfum staðið okkur gríðarlega vel og heimavöllurinn hefur verið sterkur. Við höfum sótt einn titil en þurfum að enda þetta með sæmd og ekki bjóða upp á aðra svona frammistöðu. Ég held það þurfi líka helvíti mikið til svo við fáum aðra svona frammistöðu frá Vestraliðinu.
Athugasemdir
