Íslenska landsliðið tekur þátt á Evrópumótinu næsta sumar. Mótið fer fram í Englandi.
Englendingar eru stórhuga fyrir mótið og ætla að gera það að glæsilegasta kvennamóti sem haldið hefur verið. Mótið hefst 6. júlí 2022 og lýkur svo með úrslitaleik sem fram fer á Wembley þann 31. júlí.
Leikið verður í fjórum riðlum og er Ísland í fjórða styrkleikaflokki. Það verður dregið í riðla á fimmtudaginn.
Þorsteinn Halldórsson, landsliðsþjálfari, var spurður að því á fréttamannafundi í kvöld hvort hann væri með einhvern draumariðil í huganum.
„Ég er rosalega lítið búinn að skoða þetta. Ég er ekki búinn að pæla rosalega mikið í þessu. Við vorum aðeins að ræða þetta í gær en annars höfum við ekki mikið verið að ræða þetta, við þjálfararnir. Við vorum að einbeita okkur að þessu verkefni."
Alexandra Jóhannsdóttir, miðjumaður liðsins, var einnig á fundinum. Hún var spurð hvort hún væri með einhvern draumariðil.
„Ég væri til í að spila við England í opnunarleiknum. Svo væri Þýskaland líka flott," sagði Alexandra, sem spilar með Eintracht Frankfurt í þýsku úrvalsdeildinni.
„Reyndar, það var rætt í gær að við vildum fá England í opnunarleik. Það var einhverjum sem langaði að spila á Old Trafford, en ég er City er aðdáandi og það skiptir ekki miklu máli fyrir mig," sagði Steini léttur.
Sjá einnig:
EM á Englandi bíður stelpnanna okkar - Á hvaða völlum spilar Ísland?
Athugasemdir