Sambandsdeildin: Blikar áfram þrátt fyrir tap

Breiðablik er komið áfram í undanúrslit í forkeppni Sambandsdeildarinnar þrátt fyrir tap gegn Buducnost í Svartfjallalandi.

Það var lítið að frétta fyrsta hálftímann en svo fengu Blikar dauðafæri þegar Kristinn Steindórsson skallaði boltann framhjá. Skömmu síðar refsuðu heimamenn með opnunarmarki leiksins, Branislav Jankovic skoraði þá eftir góða stungusendingu frá Zoran Petrovic.

Skömmu síðar komust Svartfellingar nálægt því að tvöfalda forystuna en boltinn endaði framhjá og staðan 1-0 í hálfleik, 2-3 samanlagt.

Ísak Snær Þorvaldsson var snöggur að jafna leikinn í síðari hálfleik. Hann gerði frábærlega að taka á móti fastri sendingu frá Viktori Karli Einarssyni, snúa sér við og klára í netið með fagmannlegu slútti.

Heimamenn komust nálægt því að taka forystuna skömmu síðar en Anton Ari Einarsson varði meistaralega og var lítið að frétta þar til Blikar virtust byrja að taka völdin á vellinum á lokakaflanum. Höskuldur Gunnlaugsson skaut í stöngina rétt áður en Vladan Adzic skoraði fyrir Buducnost, með skalla eftir aukaspyrnu.

Dómarinn bætti sex mínútum við venjulegan leiktíma og tókst Svartfellingum ekki að skora annað mark. Blikar fara því áfram í næstu umferð og mæta afar sterkum andstæðingum - Istanbul Basaksehir.

Víkingur R. er einnig komið áfram í næstu umferð og mætir pólska stórliðinu Lech Poznan.