Kolbeinn Þórðarson fékk að spila síðustu mínúturnar í 3-1 sigri Lommel SK gegn Virton í B-deildinni í Belgíu.
Kolbeinn er kominn með eina stoðsendingu í fimm leikjum en Lommel er með 12 stig eftir 10 umferðir. Kolbeinn missti af upphafi tímabilsins vegna meiðsla.
Í Hollandi kom Kristófer Ingi Kristinsson inn af bekknum til að spila síðasta stundarfjórðunginn í 1-2 tapi Venlo gegn Jong AZ Alkmaar í hollensku B-deildinni.
Venlo byrjaði tímabilið vel en þetta var þriðja tap liðsins í síðustu fjórum leikjum. Venlo er með 19 stig eftir 13 umferðir og stefnir á að berjast um sæti í efstu deild.
Að lokum var Aron Sigurðarson í byrjunarliðinu hjá Horsens sem steinlá gegn toppliði dönsku deildarinnar, Nordsjælland.
Nordsjælland vann leikinn aðeins 2-0 en hefði getað unnið talsvert stærra. Aron og félagar áttu ekki eina einustu marktilraun í leiknum og eru komnir með 18 stig eftir 15 umferðir.
Lommel 3 - 1 Virton
Venlo 1 - 2 Jong AZ
Nordsjælland 2 - 0 Horsens