Spánn: Ótrúleg titilbarátta - Sögulegt tap Barcelona

Lionel Messi gerði eina markið í fyrri hálfleik er Barcelona tók á móti Granada í spænsku deildinni.

Barca gat farið á topp deildarinnar með sigri en gestirnir refsuðu eftir leikhlé.

Granada átti aðeins tvær marktilraunir sem hæfðu rammann í dag og fóru þær báðar í netið. Fyrst skoraði Darwin Machis og svo Jorge Molina.

Ronald Koeman, þjálfari Barca, var sendur upp í stúku á 66. mínútu leiksins í stöðunni 1-1 fyrir kjaftbrúk. Ástæðan er óljós og virtist þjálfarinn mjög hissa á ákvörðun dómarans.

Börsungar reyndu að koma til baka en marktilraunir þeirra hæfðu ekki rammann í síðari hálfleik. Barca er í þriðja sæti eftir tapið, tveimur stigum eftir toppliði Atletico Madrid. Aðeins þrjú stig skilja fjögur efstu lið deildarinnar að þegar fimm umferðir eru eftir.

Þetta var í fyrsta sinn í sögunni sem Granada leggur Barcelona að velli á Camp Nou. Liðin hafa mæst þar 25 sinnum.