Strákarnir í U21 verða í eldlínunni á miðvikudaginn þegar þeir taka á móti Armenum á Fylkisvelli og hefst leikurinn kl. 16:30. Liðið heldur svo til Frakklands að leik lokum en leikið verður gegn heimamönnum, mánudaginn 8. september.
Íslenska liðið er í öðru sæti riðilsins en það sæti getur gefið réttinn til að leika í umspili fyrir úrslitakeppni EM 2015. Frakkar hafa þegar tryggt sér efsta sæti riðilsins en Armenar eru með 6 stig eftir sex leiki.
Efsta þjóðin í hverjum riðli kemst í umspilið ásamt þeim fjórum þjóðum sem eru með bestan árangur af liðunum í öðru sæti riðlanna tíu.
„Armenar eiga enga möguleika á að komast áfram úr riðlinum og maður veit ekki hverja þeir mæta með í leikinn. Þeir voru sterkir í fyrri leiknum sem við spiluðum gegn þeim," segir varnarmaðurinn Hörður Björgvin Magnússon.
Hörður var lánaður frá Juventus til Cesena í eitt ár en Cesena leikur í ítölsku A-deildinni. Þá var hann valinn í A-landsliðshópinn sem er að fara að mæta Tyrklandi í næstu viku.
„Ég er mjög stoltur af því að hafa verið valinn í það og fá að vera partur af þessum góða hópi sem liðið er í dag," segir Hörður en viðtalið má sjá í heild í sjónvarpinu hér að ofan.
Athugasemdir
