Ítalía: Quagliarella skoraði í frábærum sigri Sampdoria

Sampdoria vann sinn fyrsta sigur í Serie A á tímabilinu í kvöld er liðið mætti Fiorentina á útivelli í þriðju umferð.

Ljóst var að verkefnið væri erfitt fyrir gestina sem mættu þó grimmir til leiks og komust yfir með marki frá reynsluboltanum Fabio Quagliarella.

Staðan var 1-0 þar til á 72. mínútu er Dusan Vlahovic jafnaði metin fyrir heimamenn og staðan orðin 1-1.

Tíu mínútum seinna kom svo sigurmarkið en það gerði Valerio Verre fyrir Sampdoria sem gerði sér lítið fyrir og vann 2-1 útisigur á erfiðum velli.

Fiorentina hefur nú tapað tveimur leikjum í röð eftir dramatískan 4-3 tapleik gegn Inter í síðustu umferð.