Tveir Íslendingar byrjuðu leikinn. Stefán Teitur var í liði Silkeborg á meðan Orri Steinn Óskarsson fékk tækifærið hjá FCK.

Gestirnir í Silkeborg komust yfir undir lok fyrri hálfleiks og þá lagði Stefán Teitur upp annað markið þegar tæpur hálftími var eftir af leiknum.

Fyrsta stoðsending hans á tímabilinu, en þar að auki er hann með fimm deildarmörk.

Síðari leikurinn í 8-liða úrslitunum fer fram eftir þrjá daga á heimavelli Silkeborg.

Brynjólfur Andersen Willumsson og hans menn í Kristiansund eru ekki í neitt sérstaklega góðum málum í umspilinu um sæti í norska úrvalsdeildina.

Liðið tapaði fyrir Vålerenga í dag, 2-0, en liðin mætast í síðari leiknum á heimavelli Vålerenga. Kristiansund þarf því kraftaverk til að komast upp í deild þeirra bestu. Brynjólfur spilaði allan leikinn og nældi sér í gult spjald.

Síðari leikurinn fer fram 10. desember.