Elvar Geir Magnússon skrifar frá Lettlandi
„Ég sé allar forsendur fyrir því að ná í þrjú stig en þau gætu verið mjög torsótt,"
Guðmundur Hilmarsson, blaðamaður á Morgunblaðinu, hefur fylgt íslenska landsliðinu víða. Ég ræddi við hann um komandi leik gegn Lettum en Guðmundur er staddur í Ríga.
„Við eigum að vera með betri leikmenn í flestum stöðum. Svona leikir gegn liðunum í austrinu hafa hinsvegar oft reynst okkur Íslendingum erfiðir. Lettarnir munu liggja til baka og við verðum í stjórnunarhlutverkinu," segir Guðmundur.
„Þetta gæti verið lokaður leikur en nú eiga menn að nýta leikinn gegn Tyrkjum og ná upp sama takti í spilið. Strákarnir eru í fínu formi, eru allir að spila og ég sé allar forsendur fyrir því að ná í þrjú stig en þau gætu verið mjög torsótt,"
Reikna má með því að Lettar leggi mikla áherslu á að reyna að stöðva Gylfa Sigurðsson.
„Gylfi flýgur mjög hátt þessa dagana, er í fantaformi og leggur upp mörk hægri vinstri. Ef hann verður tekinn stíft getur losnað um aðra. En Gylfi getur skapað hættu með þessum föstu leikatriðum sem geta nýst okkur í þessum leik."
Viðtalið má sjá í heild í sjónvarpinu hér fyrir ofan en þar kemur Guðmundur með spá fyrir leikinn.
Athugasemdir
