Ágúst Gylfason.
Árni í markinu átti góðan leik.
„Svekkjandi að tapa fyrir framan okkar stuðningsfólk og gefa Víkingum ekki aðeins meiri leik. Þetta var erfitt hjá okkur, náðum ekki alveg að spila okkar leik einhvern veginn. Við ætluðum að halda boltanum betur og Víkingar lokuðu vel á okkur. Við sköpuðum einhver færi en eftir að þeir skoruðu týpískt Víkingsmark, 'Niko special', varð þetta dálítið erfitt," sagði Ágúst Gylfason, þjálfari Stjörnunnar, eftir leikinn gegn Víkingi í kvöld.
Lestu um leikinn: Stjarnan 0 - 2 Víkingur R.
„Við hefðum mátt „matcha" þá betur líkamlega, þeir voru kröftugir og sterkari en við út á velli. Við þurfum bara að rífa okkur áfram og halda okkar uppleggi. Það mun skila sigrum og við þurfum bara að horfa fram á við."
„Við fengum fullt af góðri hvatningu frá okkar fólki í stúkunni og einhverjir Víkingar sem voru mættir líka. Þetta var bara hörkukvöld, frábært veður og fínn fótboltaleikur. Því miður fengum við lítið út úr honum en núna er fyrsti leikurinn búinn og mesti hrollurinn farinn úr þessu. Nú er bara áfram gakk og fara í næsta leik."
Hilmar Árni Halldórsson varðist sem fremsti maður í kvöld. „Við erum búnir að spila þetta nokkuð oft í vetur og með Hilmar frammi. Það hefur komið mjög vel út. Ég er nokkuð sáttur við hans frammistöðu og gaman að sjá hann aftur á vellinum."
Árni Snær Ólafsson varði mark Stjörnunnar í kvöld og átti góðan leik. „Árni var frábær í markinu og hélt okkur inn í leiknum í stöðunni 1-0 - þá gat allt gerst. Hann var sennilega okkar besti maður," sagði Gústi.
Viðtalið í heild sinni má sjá í spilaranum að ofan.
Athugasemdir
