Ólafur Ingi: Þá held ég að sigurinn skili sér

„Þetta eru skemmtilegir leikir í Sambandsdeildinni, við erum brattir.“

Breiðablik mætti Shamrock fyrir tveimur árum í forkeppni Meistaradeildarinnar og bar þá sigur úr býtum. Á blaðamannafundinum sagði Ólafur margt vatn hafa runnið til sjávar síðan þá og býst við öðruvísi Írum.

„Ég býst við að þeir vilji reyna hleypa þessu upp. Þetta er líkamlega sterkt írskt lið - þeir eru góðir í návígum, góðir í að vinna seinni bolta og beinskeyttir. Við þurfum að vera klárir í slaginn og í þessa grunnvinnu sem skiptir miklu máli.“

„Ég á von á því að þeir bakki á okkur og að við komum til með að halda aðeins meira í boltann. Við erum undirbúnir fyrir það, en það gæti verið að þeir sjái leikinn öðruvísi fyrir sér: Vilji stíga aðeins á okkur, en það verður að koma í ljós.“

Setjiði kröfu á sigur?

„Við setjum alltaf kröfur á sigur. Það sem skiptir mestu í þessu er að við gerum okkar. Ef að við náum upp góðri frammistöðu og náum því besta út úr okkar liði þá held ég að sigurinn skili sér. Þetta snýst um okkar hugarfar og hvernig við útfærum leikinn.“

Breiðablik er með tvö stig þegar tveir leikir eru eftir, en Ólafur segir stefnuna setta á að reyna ná umspilssætinu.

„Ekki spurning. Við viljum fara til Frakklands með eitthvað undir. Við viljum vinna leikinn á morgun og fara til Frakklands í erfiðan leik með eitthvað undir. Það er klárlega markmiðið.“

Viðtalið má sjá í heild sinni í spilaranum hér að ofan.