Mimi Eiden er hetja dagsins á Ísafirði eftir að hafa skorað bæði mörk Vestra í fyrsta sigri liðsins á deildartímabilinu.

Vestri tók á móti Álftanesi í 2. deild kvenna og komust heimakonur yfir strax á sjöundu mínútu þegar Mimi skoraði.

Vestri leiddi í leikhlé og hélst staðan 1-0 allt þar til á 60. mínútu, þegar hin efnilega Ásthildur Lilja Atladóttir jafnaði leikinn fyrir gestina.

Á lokakafla leiksins fengu heimakonur svo dæmda vítaspyrnu og steig Mimi á punktinn. Henni brást ekki bogalistin og urðu lokatölur 2-1 fyrir Vestra, sem er kominn með 5 stig eftir 10 fyrstu umferðir sumarsins.

Álftanes situr eftir með 4 stig en á leik til góða.