Enska úrvalsdeildarfélagið Liverpool hefur mikinn áhuga á að fá hollenska miðjumanninn Ryan Gravenberch frá Bayern München en þetta segir David Ornstein hjá Athletic.
Gravenberch hefur aðeins fengið 418 mínútur hjá Bayern frá því hann kom frá Ajax á síðasta ári.
Hollendingurinn var einn besti maður Ajax á síðustu leiktíð og hefur þá unnið sér sæti í hollenska landsliðinu.
Liverpool ætlar að leita að ódýrari kostum til að styrkja miðsvæðið í sumar og mun því Jude Bellingham ekki ganga í raðir félagsins frá Borussia Dortmund.
David Ornstein, einn virtasti blaðamaður Bretlandseyja, greinir frá því að Liverpool hafi fundað með umboðsmanni Gravenberch í von um að sannfæra hann um að ganga í raðir félagsins.
Gravenberch, sem er tvítugur, gæti verið falur fyrir um það bil 40 milljónir punda í sumar.
Athugasemdir