Liverpool lagði West Brom að velli í frábærum fótboltaleik í ensku úrvalsdeildinni í dag.

Markvörðurinn Alisson skoraði sigurmark Liverpool í uppbótartíma með skalla eftir horn.

Trent Alexander-Arnold tók hornspyrnu sem Alisson skallaði í markið. Hann er fyrsti markvörðurinn til að skora mark fyrir Liverpool í keppnisleik frá því félagið var stofnað 1892.

Staðan hefði getað verið önnur á þeim tímapunkti því fyrr í seinni hálfleiknum, nánar tiltekið á 71. mínútu, var mark tekið af West Brom á umdeildan hátt.

Kyle Bartley skoraði en dómarinn - Mike Dean - mat það þannig að Matt Phillips hefði verið rangstæður og skyggt á sýn Alisson í marki Liverpool. Það eru ekki allir sammála þessu, eins og gengur og gerist.

Hægt er að sjá markið með því að smella hérna. Jamie Carragher, fyrrum leikmaður Liverpool, lýsti leiknum á Sky og hann sagði að hann hefði orðið pirraður ef hann væri leikmaður West Brom.

Þetta var gríðarlega mikilvægur sigur fyrir Liverpool sem er núna einu stigi frá Meistaradeildarsæti.

Tweet

Senda a Facebook Hafdu samband Senda frétt Prenta frétt Frétta leit