Giorgio Furlani, framkvæmdastjóri Milan, var spurður hvort einhver af stærstu stjörnum liðsins yrði seld komandi sumar.

„Théo Hernandez, Rafa Leao og Mike Maignan eru samningsbundnir AC Milan og þeim líður vel hjá félaginu," sagði Furlani við DAZN.

„Við þurfum ekki að selja neinn leikmann í sumar. Við getum keypt nýja leikmenn án þess að selja lykilmenn frá okkur."

Milan hefur ekki gengið sérlega vel í ítölsku deildinni síðan liðið varð Ítalíumeistari undir stjórn Stefano Pioli fyrir tveimur árum, en Pioli er enn við stjórn og vill stór hluti stuðningsfólks Milan fá hann út.

Milan endaði í fjórða sæti í fyrra, 20 stigum eftir toppliði Napoli, og er í öðru sæti sem stendur, 14 stigum eftir toppliði Inter þegar sex umferðir eru eftir.

Vinstri bakvörðurinn Hernandez og markvörðurinn Maignan eru samningsbundnir Milan næstu tvö árin, eða til sumarsins 2026, á meðan Leao er með samning sem gildir til 2028.