Josip Zeba fagnar marki fyrir Grindavík
Josip Zeba stóð vaktina að vanda í hjarta varnar Grindavíkur þegar liðið tók á móti HK á Mustadvellinum í Grindavík í dag. HK komst yfir eftir að vítaspyrna var dæmd á Zeba fyrir brot á Birki Val Jónssyni en myndbandsupptökur benda til þess að sá dómur hafi hreinlega verið rangur.
Lestu um leikinn: Grindavík 1 - 1 HK
„Mér persónlega líður bara illa, við gerðum okkar besta og börðumst til enda og áttum kannski meira skilið en svona er fótboltinn," sagði Zeba um sín fyrstu viðbrögð eftir leik.
Vítaspyrna var dæmd á Zeba eins og áður sagði. Fannst honum þetta vera víti?
„Mér fannst það ekki. Fólk kom til mín strax eftir leik og sagði mér að þetta hefði ekki átt að vera víti en dómarinn sér það hann sér. Mér fannst það ekki vera víti en það er ekki mikilvægt, hann dæmir víti og þeir skora og það er ekki auðvelt að koma til baka eftir það en ég segi bara til hamingju við liðið mitt. Við börðumst og börðumst til síðustu stundar og munum berjast í hverjum einasta leik.“
Grindavík verður seint þekkt fyrir logn og talsverður vindur var á vellinum í dag. Hvernig kann Zeba við að spila í suðurnesjagolunni?
„Allir hér í Grindavík segja mér að þetta sé besta sumar sem verið hefur. Fyrir mig er veðrið fullkomið, við æfum á þessum fullkomna velli og allir gera sitt besta svo vindurinn er ekkert vandamál fyrir okkur.“
Sagði Josip Zeba en allt viðtalið má sjá hér að ofan.
Athugasemdir
