Besta deild kvenna: Sterkur útisigur Víkings - Bergþóra skoraði í frumraun sinni

Bergþóra Sól Ásmundsdóttir skoraði í fumraun sinni með Víkingum sem unnu Þór/KA, 2-0, í Bestu deild kvenna á VÍS-vellinum á Akureyrir í kvöld.

Víkingur fékk Bergþóru frá sænska félaginu Örebro á dögunum og var hún sett í byrjunarliðið í fyrsta leik.

Jafnræði var með liðunum í fyrri hálfleik en það var Kimberley Dóra Hjálmarsdóttir sem átti besta færi Þór/KA en Birta Guðlaugsdóttir varði skot hennar í slá áður en Karen María Sigurgeirsdóttir skaut boltanum framhjá.

Þremur mínútum síðar skoraði Bergþóra Sól fyrsta mark sitt fyrir félagið. Selma Dögg Björgvinsdóttir, fyrirliði Víkinga, kom með góða fyrirgjöf inn í teiginn og á Bergþóru sem negldi boltanum í netið. Draumabyrjun hjá henni.

Liðin fóru illa með ágætis færi. Margrét Árnadóttir og Sandra María Jessen fengu góð færi en settu boltann framhjá markinu og þá átti Bergdís Sveinsdóttir skalla beint á Shelby Money í markinu.

Á lokasekúndum leiksins tryggðu Víkingar sér sigurinn. Hildur Anna Birgisdóttir átti slæma sendingu á Lindu Líf Boama sem brunaði upp völlinn áður en hún skaut boltanum yfir Money og í netið.

Lokatölur á VÍS-vellinum, 2-0, Víkingum í vil. Liðið er í 4. sæti með 19 stig, eins og FH, sem er í sætinu fyrir neðan. Þór/KA er á meðan í 3. sæti með 24 stig.