Pioli er 58 ára gamall og hefur hann verið við stjórnvölinn hjá AC Milan síðan 2019 og unnið einn titil með félaginu, ítölsku deildina fyrir tveimur árum.

Gengi liðsins er ekki talið vera nægilega gott þrátt fyrir að innanborðs séu afar öflugir leikmenn á borð við Theo Hernandez og Rafael Leao.

Milan er í öðru sæti ítölsku deildarinnar, 14 stigum eftir toppliði Inter þegar 6 umferðir eru eftir.

Pioli á aðeins eitt ár eftir af samningi við Milan og eru stjórnendur félagsins þegar byrjaðir í leit af arftaka hans.

Þar hefur Julen Lopetegui verið nefndur til sögunnar sem líklegasti kosturinn í stöðunni. Stjórnendur Milan hafa miklar mætur á honum.

Lopetegui er 57 ára gamall og stýrði síðast Wolves tímabilið 2022-23 eftir að hafa þjálfað spænska landsliðið, Porto, Real Madrid og Sevilla á ferlinum.

Lopetegui lék meðal annars fyrir Real Madrid og Barcelona á ferli sínum sem leikmaður, þar sem hann var varamarkvörður hjá báðum stórveldunum og spilaði auk þess einn A-landsleik fyrir Spán.