Stórleik dagsins í ensku úrvalsdeildinni var að ljúka þar sem Tottenham tók á móti Englandsmeisturum Liverpool.

Staðan var markalaus eftir nokkuð bragðdaufan fyrri hálfleik þar sem helst dró til tíðinda þegar Xavi Simons fékk að líta beint rautt spjald fyrir glæfralegt brot á samlanda sínum Virgil van Dijk.

Tíu leikmenn Tottenham spiluðu vel gegn Liverpool og hélst staðan jöfn allt þar til í síðari hálfleik. Nýju leikmennirnir sem hafa verið harðlega gagnrýndir, þeir Florian Wirtz og Alexander Isak, tengdu vel saman til að taka forystuna á 56. mínútu. Isak meiddist þó við að skora markið og var skipt af velli fyrir Jeremie Frimpong. Isak byrjaði á bekknum en var skipt inn í hálfleik fyrir Conor Bradley sem meiddist og svo fór Frimpong líka meiddur af velli á lokamínútunum.

Tíu mínútum síðar tvöfaldaði Hugo Ekitike forystuna með skalla eftir fyrirgjöf en leikmenn Tottenham voru mjög ósáttir með markið. Þeir vildu fá dæmda bakhrindingu á Ekitike en VAR-teymið taldi ekki að hér væri um augljós mistök dómara að ræða. Cristian Romero fyrirliði Tottenham fékk gult spjald fyrir mótmæli eftir markið hans Ekitike.

Tíu leikmenn Tottenham héldu áfram að berjast og kom Richarlison inn af bekknum á lokakaflanum. Hann skoraði skömmu síðar og reyndist afar líflegur. Heimamenn í liði Spurs fengu færi til að jafna leikinn þrátt fyrir að vera manni færri en tókst það ekki í venjulegum leiktíma.

Í uppbótartíma fékk Romero svo að líta seinna gula spjaldið sitt og var rekinn af velli. Níu leikmenn Tottenham náðu að skapa sér hættulegar stöður á lokamínútunum en gátu ekki skorað framhjá Alisson Becker, svo lokatölur urðu 1-2. Afar ósannfærandi sigur hjá Liverpool.

Liverpool fer upp í fimmta sæti úrvalsdeildarinnar með þessum sigri, þar sem liðið er komið með 29 stig eftir 17 umferðir. Tottenham situr eftir með 22 stig.