Það komu nokkrir Íslendingar við sögu í leikjum dagsins víða um Evrópu. Hjörtur Hermannsson var á sínum stað í hjarta varnarinnar hjá Volos sem hélt hreinu í efstu deild gríska boltans.
Volos vann 1-0 og jafnar Hörð Björgvin Magnússon og félaga í liði Levadiakos á stigum. Liðin deila fjórða sæti deildarinnar með 25 stig, en Levadiakos á leik til góða.
Í ítalska boltanum kom Bjarki Steinn Bjarkason við sögu er Venezia sigraði gegn Modena í toppbaráttu í Serie B. Bjarki Steinn fékk að spila síðustu mínúturnar og eru Feneyingar í þriðja sæti með 32 stig eftir 17 umferðir - fimm stigum frá toppsætinu.
Í Serie C vann Renate þægilegan sigur á útivelli gegn Pro Patria. Óttar Magnús Karlsson lék fyrstu 70 mínúturnar.
Í næstefstu deild í Þýskalandi voru Valgeir Lunddal Friðriksson og Brynjar Ingi Bjarnason utan hóps vegna meiðsla í Íslendingaslag. Liðsfélagar Valgeirs í liði Fortuna Düsseldorf stóðu uppi sem sigurvegarar 2-1 gegn Greuther Fürth.
Þetta er dýrmætur sigur fyrir Düsseldorf en bæði lið eru í fallsætum sem stendur. Düsseldorf með 17 stig eftir 17 umferðir og Greuther Fürth með 15 stig.
Jón Dagur Svanþórsson var veikur og tók því ekki þátt í tapleik Grimsby í fjórðu efstu deild á Englandi. Grimsby hefur gengið hörmulega undanfarnar vikur og er með 27 stig eftir 21 umferð.
Að lokum gerði Damaiense 3-3 jafntefli í botnbaráttu portúgölsku kvennadeildarinnar. Lærlingar Kristjáns Guðmundssonar tóku forystuna í þrígang en náðu ekki að sigra.
Damaiense er með 6 stig eftir 8 umferðir.
Volos 1 - 0 Panetolikos
Modena 1 - 2 Venezia
Pro Patria 0 - 3 Renate
Dusseldorf 2 - 1 Greuther Furth
Bromley 2 - 0 Grimsby
Maritimo 3 - 3 Damaiense
Athugasemdir
