Dyche vill betri leikmenn - Sagðir hafa boðið í Azmoun

Burnley var í dag orðað við Sardar Azmoun, sóknarmann Zenit í Rússlandi. Samkvæmt heimildum Sky Sports News hefur Burnley boðið tíu milljónir punda í íranska framherjann.

Samningur Azmoun við Zenit rennur út í sumar og eru AC Milan, Bayer Leverkusen og Lyon einnig með augastað á honum.

Azmoun er 27 ára gamall og hefur skorað sextíu mörk í 104 leikjum fyrir Zenit og 39 mörk í sextíu landsleikjum fyrir Íran.

„Við þurfum að fá inn leikmenn sem geta haft áhrif á hópinn á jákvæðan hátt. Við þurfum að fá inn leikmenn sem styrkja liðið, annars er lítill tilgangur í því að fá þá," sagði Dyche.

Burnley er í botnsæti deildarinnar og á framundan leik gegn Arsenal á sunnudag.