Firmino hefur eytt síðustu átta árum hjá Liverpool og farið í gegnum hæðir og lægðir með liðinu.

Hann hefur unnið allt sem hægt er að vinna á hæsta stigi með Liverpool og spilað 361 leik og gert 110 mörk.

Á dögunum var tilkynnt að hann væri á förum í sumar en samningur hans við félagið rennur út í lok júní. Hann fékk því tækifæri til að kveðja stuðningsmenn Liverpool á Anfield í gær er liðið mætti Aston Villa.

Hann kom af bekknum og gerði jöfnunarmarkið undir lok leiks. Ágætis leið til að kveðja stuðningsmennina og sungu þeir nafn hans hástöfum og féllu nokkur tár hjá Brasilíumanninum eins og sjá má hér fyrir neðan.