Jökull I. Elísabetarson þjálfari Stjörnunnar

Mynd: Fótbolti.net - Hafliði Breiðfjörð

„Frábær leikur. Mér fannst við spila vel bæði sóknarlega og varnarlega. Það var gott jafnvægi í liðinu og ég er bara virkilega ánægður. Mér fannst þetta frábær leikur hjá okkur." Sagði Jökull I. Elísabetarson þjálfari Stjörnunnar eftir sigurinn í kvöld.

„Við vissum að þeir myndu ekki koma og pressa okkur og þeir eru þéttir og myndu bíða eftir að fá boltann frá okkur og örugglega helst klaufalega. Við gerðum það í nokkru skipti í leiknum sem er ekki klókt og við þurfum aðeins að passa upp á það. Við spiluðum nokkrum sinnum upp í hendurnar á þeim."

„Við ræddum það fyrir leik og við ræddum það í hálfleik að halda fókus og vera þolinmóðir en halda líka tempói og vissum að það var það sem þyrfti og auðvitað vissum við að við hefðum það sem þyrfti til þess að klára það."

Stjörnumenn eru að spila í Evrópukeppni og stutt á milli leikja en það var ekki að sjá neina Evrópuþynnku í kvöld.

„Það er mikilvægt fyrir okkur að halda tempói og vera sharp. Það skiptir ekki máli hvort við séum í Evrópukeppni eða deild við viljum bara halda áfram að verða betri og það er búið að vera mjög mikill stígandi hjá okkur undanfarið í nokkrum leikjum sem við erun ánægðir með og það verður bara að halda áfram í hverjum einasta leik. Það verður auðvelt að gíra menn upp á fimmtudaginn en svo kemur leikur á sunnudaginn þar sem við þurfum að vera klárir aftur í svona frammistöðu."

Nánar er rætt við Jökul I. Elísabetarson þjálfara Stjörnunnar í spilaranum hér fyrir ofan.