Maduka Okoye markvörður Udinese lét reka sig af velli snemma leiks eftir herfilega misheppnað úthlaup af marklínunni í tilraun til að stöðva Moise Kean sem var að sleppa í gegn.

Tíu leikmenn Udinese réðu ekki við Fiorentina og tóku heimamenn forystuna með marki úr aukaspyrnu frá Rolando Mandragora á 21. mínútu. Eftir skemmtilega útfærslu spyrnti Mandragora boltanum mjög fast og lágt á mitt markið þar sem varamarkvörðurinn Razvan Sava átti að gera betur í að stöðva boltann.

Albert tvöfaldaði forystuna skömmu fyrir leikhlé eftir glæsilegt einstaklingsframtak. Hann smurði boltann laglega upp í samskeytin eftir að hafa skilið varnarmenn Udinese eftir með hælana í jörðinni með frábærum snúningi rétt utan teigs.

Sjáðu markið

Cher Ndour setti þriðja mark Fiorentina og gerði Moise Kean svo tvennu í síðari hálfleik, svo lokatölur urðu 5-1.

Þetta er kærkominn sigur fyrir botnlið Fiorentina sem er núna með 9 stig eftir 16 umferðir. Udinese er um miðja deild með 21 stig.

Fyrr í dag gerðu Cagliari og Pisa 2-2 jafntefli. Nýliðar Pisa jöfnuðu á 89. mínútu til að bjarga stigi í fallbaráttunni.

Torino hafði þá betur gegn nýliðum Sassuolo. Nikola Vlasic, fyrrum leikmaður Everton og West Ham, skoraði eina mark leiksins úr vítaspyrnu.

Fiorentina 5 - 1 Udinese
1-0 Rolando Mandragora ('21 )
2-0 Albert Gudmundsson ('42 )
3-0 Cher Ndour ('45+5 )
4-0 Moise Kean ('56 )
4-1 Oumar Solet ('66 )
5-1 Moise Kean ('68 )
Rautt spjald: Maduka Okoye, Udinese ('8)

Cagliari 2 - 2 Pisa
0-1 Matteo Tramoni ('45 , víti)
1-1 Michael Folorunsho ('59 )
2-1 Semih Kilicsoy ('71 )
2-2 Stefano Moreo ('89 )

Sassuolo 0 - 1 Torino
0-1 Nikola Vlasic ('66 , víti)