Breiðablik mætti Val fyrr í kvöld í spennuþrungnum leik á Hlíðarenda. Breiðablik náði forystu snemma í síðari hálfleik. Valsmenn fengu vítaspyrnu þegar langt var liðið á uppbótartímann, eftir að boltinn fór í hendina á Valgeiri Valgeirssyni í teig Breiðabliks. Valsarar skoruðu úr vítinu og jöfnuðu metin á dramatískan hátt. Valgeir Valgeirsson, sem er jafnframt afmælisbarn dagsins, mætti í viðtal að leik loknum.
Lestu um leikinn: Valur 1 - 1 Breiðablik
„Mjög erfiðar, svekkjandi að fá jöfnunarmark á okkur í lokin. Enn og aftur erum við yfir allan leikinn og með leikinn í okkar höndum svo missum við þetta frá okkur í lokin. Algjör óheppni og svekkjandi að fá boltann í hendina, ömurleg tilfinning.“
„Ég veit að ég fékk hann í hendina, ég veit ekki alveg hvernig stöðu ég var í. Það var allt í gangi þarna. Ekkert að kvarta yfir, ég veit að ég fékk hann í hendina. Ég verð að trúa að dómarinn hafi tekið rétta ákvörðun þarna.“
Breiðablik er í fjórða sæti deildarinnar, tíu stigum frá toppnum og sex stigum frá Evrópusæti.
„Við erum að einbeita okkur að Evrópu. Auðvitað verður maður að hafa trú á því að það sé hægt að ná í titilinn en Víkingar eru komnir helvíti langt á undan okkur núna þegar fjórir leikir eru eftir.“
Breiðabliksliðið hefur sætt mikilli gagnrýni undanfarið, á hún rétt á sér?
„Já, auðvitað á hún rétt á sér þegar við eigum að vera í þessari toppbaráttu miðað við gæðin í liðinu og hvað við getum. Við vitum hvað við getum og vonandi náum við að rífa okkur upp í næstu leikjum og taka sigur þar.“
Athugasemdir
