Það hefur verið ágætis taktur í Liverpool-liðinu í síðustu leikjum og stefnir liðið hraðbyr í átt að Meistaradeildinni.

Arne Slot neyddist til þess að gera markmannsskiptingu, en Giorgio Mamardashvili og Alisson Becker eru báðir meiddir og kom hinn 29 ára gamli Freddie Woodman inn í liðið.

Sá stóð sig frábærlega gegn Crystal Palace og átti hann margar góðar vörslur.

Liverpool komst á bragðið í leiknum á 35. mínútu er Alexander Isak fékk sendingu frá Alexis Mac Allister, skaut boltanum í grasið og í hægra hornið. Fyrsta mark hans síðan í desember.

Fimm mínútum síðar voru Palace-menn nálægt því að jafna metin er Jean-Philippe Mateta átti skalla sem Woodman varði frábærlega og í kjölfarið keyrðu heimamenn upp í skyndisókn. Curtis Jones sendi Andy Robertson í gegn sem klíndi boltanum út við stöng og í netið.

Góð forysta hjá Liverpool í hálfleik, en liðið varð fyrir áfalli snemma í þeim síðari er Mohamed Salah fór meiddur af velli. Vonandi fyrir Liverpool-menn að þetta hafi ekki verið kveðjuleikur hans á tímabilinu.

Tólf mínútum síðar minnkaði Daniel Munoz muninn fyrir Palace-menn og fór aðeins um heimamenn eftir markið.

Seint í uppbótartíma tókst þýska landsliðsmanninum Florian Wirtz að róa taugarnar með þriðja markinu. Joe Gomez tók langt inn kast á Mac Allister, sem lagði boltann út á Wirtz sem skoraði með föstu skoti í vinstra hornið.

Þriðji deildarsigur Liverpool í röð staðreynd og liðið komið upp í 4. sæti deildarinnar með 58 stig en Palace í 13. sæti með 43 stig þegar fjórar umferðir eru eftir.

West Ham marði 2-1 sigur á Everton í Lundúnum. Tomas Soucek kom Hömrunum yfir á 52. mínútu en á lokamínútunum jafnaði Kiernan Dewsbury-Hall metin.

Á þriðju mínútu í uppbótartíma skoraði Callum WIlson dýrmætt sigurmark West Ham sem hélt liðinu áfram fyrir ofan fallsæti með 36 stig.

Tottenham vann sinn fyrsta leik undir Roberto De Zerbi og fyrsta sigurinn á árinu er það lagði Wolves að velli, 1-0, á Molineux.

Portúgalinn Joao Palhinha gerði sigurmark Tottenham á 82. mínútu er hann teygði sig í skottilraun Richarlison og stýrði boltanum í netið.

Ótrúlega mikilvæg þrjú stig hjá Tottenham, en því miður fyrir liðið þá er það enn í fallsæti, tveimur stigum frá öruggu sæti fyrir síðustu fjórar umferðirnar.

Liverpool 3 - 1 Crystal Palace
1-0 Alexander Isak ('35 )
2-0 Andrew Robertson ('40 )
2-1 Daniel Munoz ('71 )
3-1 Florian Wirtz ('90 )

West Ham 2 - 1 Everton
1-0 Tomas Soucek ('52 )
1-1 Kiernan Dewsbury-Hall ('88 )
2-1 Callum Wilson ('90 )

Wolves 0 - 1 Tottenham
0-1 Joao Palhinha ('82 )