Það er afar spennandi barátta í kringum evrópusætin og fallsvæðið þar sem ýmislegt getur gerst.

Stuttgart og Hoffenheim eru í harðri baráttu um síðasta meistaradeildarsætið. Þau eru jöfn á stigum fyrir lokaumferðina en Stuttgart er með betri markatölu og getur því tryggt sér fjórða sætið með sigri.

Það verður þó erfitt verk því Stuttgart heimsækir sterkt lið Eintracht Frankfurt sem er í harðri baráttu um sæti í Sambandsdeildinni. Frankfurt er einu stigi á eftir Freiburg í baráttunni um sambandsdeildarsæti. Freiburg á erfiðan heimaleik við RB Leipzig, sem siglir lygnan sjó, í lokaumferðinni.

Bayer Leverkusen þarf kraftaverk til að komast í Meistaradeildina en liðið er öruggt með sæti í Evrópudeildinni. Að sama skapi þarf Augsburg kraftaverk til að stela sambandsdeildarsætinu.

Að lokum er gríðarleg spenna í fallbaráttunni þar sem þrjú neðstu lið deildarinnar eru jöfn á stigum. Markatalan gæti því endað á að skera úr um hvaða tvö lið falla beint niður og hvaða liði tekst að tryggja sér umspilsleik við þriðja sætið úr næstefstu deild.

Eins og staðan er núna er Wolfsburg með bestu markatöluna, en liðið heimsækir St. Pauli í ótrúlega eftirvæntum slag sem gæti reynst úrslitaleikur fallbaráttunnar. Á sama tíma spilar Heidenheim heimaleik við Mainz, sem siglir lygnan sjó.

Lokaumferðin
13:30 Heidenheim - Mainz
13:30 Union Berlin - Augsburg
13:30 Gladbach - Hoffenheim
13:30 Freiburg - RB Leipzig
13:30 Werder - Dortmund
13:30 Bayern - Köln
13:30 Frankfurt - Stuttgart
13:30 Leverkusen - Hamburger
13:30 St. Pauli - Wolfsburg