Arsenal var betri aðilinn í leiknum og var mark Alexandre Lacazette í fyrri hálfleik ekki dæmt gilt. Granit Xhaka var dæmdur brotlegur, VAR herbergið mat það svo að hann væri að trufla Kasper Schmeichel í markinu standandi í rangstöðu í kjölfar hornspyrnu.

Arteta er ekki sammála þessari ákvörðun og skilur ekki hvernig dómarateymið komst að þessari niðurstöðu.

„Ég er augljóslega mjög svekktur. Við vorum með leikinn í okkar höndum, við sköpuðum nóg af færum til að taka forystuna og skoruðum mark sem ég skil ekki hvernig í fjandanum var dæmt af," sagði Arteta að leikslokum.

„Í seinni hálfleik snerist þetta um þolinmæði gegn liði sem varðist gríðarlega neðarlega og átti ekki eina marktilraun sem hæfði rammann. Þeir sátu bara í vörn og biðu eftir mistökum til að refsa með skyndisókn, sem þeir gerðu."

Leicester er með 12 stig eftir 6 umferðir. Arsenal er með 9 stig.