Tillögur að breytingum
Fram - Fjölga í 14 lið í efstu deild. Tvöföld umferð
Fylkir - Fækka í 10 lið og spila þrefalda umferð
ÍA - Halda 12 liðum og spila þrefalda umferð
KSÍ - Halda 12 liðum og bæta við úrslitakeppni. Í úrslitakeppni skal leikin einföld umferð á milli sex efstu liða annars vegar og á milli sex neðstu liða hins vegar

Samkvæmt upplýsingum Vísis úr herbúðum Fylkis og ÍA munu félögin draga tillögur sínar til baka. Skagamenn styðja eftir því sem næst verður komist tillögu Fram en afstaða Fylkis liggur ekki fyrir.

Haukur Hinriksson, lögfræðingur KSÍ, staðfesti við Fótbolta.net í dag að ekki sé búið að draga neina tillögu til baka. Félög eiga kost á að draga tillögur til baka í dag eða á sjálfu þinginu á morgun.

Vísir segir einnig frá því að Framarar verði með stjórnarfund í kvöld innan við sólarhring fyrir þing KSÍ, þar sem þeir taka ákvörðun um framhaldið. Falli þeir frá sinni hugmynd, um 14 liða efstu deild, gæti því tillaga stjórnar KSÍ staðið ein eftir.

Kosið verður á þinginu á morgun en 2/3 atkvæða þarf til að knýja fram breytingar. Því er einnig möguleiki á að engin breyting verði og efsta deild verði með sama fyrirkomulag á næsta ári.

Ef kosið verður um breytingar má búast við að þær taki gildi á næsta ári, keppnistímabilið 2022.