Chelsea og Aston Villa áttust við í stórleik í lokaleik dagsins í ensku úrvalsdeildinni og voru heimamenn talsvert sterkari aðilinn í fyrri hálfleik.

Þeir bláklæddu fengu frábær færi til að taka forystuna en tókst ekki að koma boltanum í netið fyrr en þeir skoruðu heppnismark eftir hornspyrnu á 37. mínútu. Emiliano Martínez markvörður Villa varði boltann í Joao Pedro og þaðan skoppaði hann yfir marklínuna.

Chelsea vildi svo fá vítaspyrnu þegar boltinn fór í hendi Ian Maatsen innan vítateigs, en ekkert var dæmt.

Sjáðu atvikið

Staðan 1-0 í leikhlé þó að heimamenn hefðu hæglega getað skorað meira og áttu þeir eftir að fá það í bakið í síðari hálfleik.

Gestirnir frá Birmingham skiptu um gír og sýndu flotta takta. Ollie Watkins jafnaði á 63. mínútu eftir mistök í uppspili Chelsea úr vörninni. Watkins slapp í gegn og náði Robert Sánchez að setja líkamann fyrir marktilraunina hans en það dugði ekki til því boltinn skaust aftur í Watkins og skoppaði þaðan í netið.

Staðan var þá orðin jöfn en áfram héldu yfirburðir gestanna og náði Watkins forystunni með skalla eftir hornspyrnu á 84. mínútu.

Lokatölur 1-2 fyrir Aston Villa sem er á ótrúlegu flugi. Þetta var ellefti sigur liðsins í röð í öllum keppnum. Lærlingar Unai Emery eru í þriðja sæti ensku úrvalsdeildarinnar, þremur stigum á eftir toppliði Arsenal.

Chelsea situr eftir í 5. sæti með 29 stig eftir 18 umferðir, tíu stigum á eftir Aston Villa.