„Stjórn knattspyrnudeildar hefur átt gott samstarf með Hermanni undanfarin ár og var eindreginn vilji stjórnarinnar að halda því samstarfi áfram," segir í tilkynningu ÍBV.

„Breytingar eru hins vegar að verða á búsetu Hermanns og hans fjölskyldu og því hans mat að hann hafi ekki tök á að halda áfram sem þjálfari liðsins."

„Stjórn knattspyrnudeildar þakkar Hermanni og hans fjölskyldu fyrir góða tíma í Eyjum undanfarin þrjú ár og framlag hans nú sem áður til félagsins, og óskar Hermanni velfarnaðar í því starfi sem hann tekur að sér."

Undir stjórn Hermanns fór ÍBV upp úr Lengjudeildinni í sumar með því að sigra deildina.

Hermann, sem er fimmtugur, er fyrrum atvinnu- og landsliðsmaður til margra ára en eftir að skórnir fóru upp á hillu þá hefur hann stýrt ÍBV í tvígang, karla- og kvennaliðum Fylkis og Þrótti Vogum ásamt því að vera aðstoðarþjálfari Kerala Blasters á Indlandi og Southend á Englandi.