Jóhann Kanfory Tjörvason.
Leiknir í Breiðholti heldur áfram að bæta við leikmannahóp sinn en kantmaðurinn Jóhann Kanfory Tjörvason hefur gengið í raðir liðsins frá Víkingi Reykjavík. Hann er 18 ára gamall.
„Jóhann hefur gengið til liðs við okkur Leiknisfólk til tveggja ára frá Víking," segir á Instagram síðu Leiknis.
„Jóhann hefur gengið til liðs við okkur Leiknisfólk til tveggja ára frá Víking," segir á Instagram síðu Leiknis.
Jóhann Kanfory kom af bekknum hjá Víkingi í 4-0 sigrinum gegn KA í Bestu deildinni en það var hans annar leikur í efstu deild. Hann lék einnig í bikartapinu gegn ÍBV.
„Við viljum auka breiddina aðallega fram á við. Erum með góða breidd af miðjumönnum og varnarmönnum. Við þurfum að auka breiddina sóknarlega," sagði Ólafur Hrannar Kristjánsson, þjálfari Leiknis, í viðtali eftir 1-0 tap gegn Keflavík í bikarnum fyrr í þessum mánuði. Með tilkomu Jóhanns hefur breiddin aukist hjá Breiðhyltingum.
Leikni er spáð níunda sæti Lengjudeildarinnar en liðið heimsækir Þrótt í fyrstu umferð deildarinnar á föstudagskvöld.
Athugasemdir
