Srdjan Tufegdzic þjálfari Vals var ánægður með frammistöðu sinna manna eftir að þeir gerðu 1-1 jafntefli við Víking á Hlíðarenda.
Lestu um leikinn: Valur 1 - 1 Víkingur R.
„Baráttuleikur, rosalega erfður leikur, myndi segja svona leikur tveggja hálfleikja. Við náðum ekki alveg okkar krafti í byrjun leiks, kannski fyrstu 20-30 mínúturnar í fyrri hálfleik. Spennustigið var kannski aðeins of lágt." Sagði Túfa.
„Í seinni hálfleik vorum við með öll völd á vellinum, mikill kraftur hjá okkur og við setjum bara í næsta gír í rauninni. Við jöfnum verðskuldað og vorum mjög nálægt því að setja annað markið á þeim tímapunkti. Mér finnst vera 'momentum' þá með okkur. Leikir á milli þessa liða eru alltaf hörku leikir, og alltaf spenna eins og var hérna í lokin. Á endanum var þetta bara sanngjörn niðurstaða."
Vals liðinu var eiginlega hvergi spáð titilbaráttu og undanfarna mánuði hefur oft mátt heyra neikvætt umtal um þá. Túfa segist ekkert skilja í því.
„Það er gott að þú spyrð að þessu, því ég skil ekkert í þessari umræðu og það skilur það enginn sem starfar fyrir Val. Við erum búnir að spila minnir mig 18 leiki núna í vetur og erum búnir að vinna langflesta og búnir að tapa einum. Ég er með frábæra stjórn og frábært þjálfarateymi og mikil samstaða í öllu því sem við erum að gera. Leikmannahópurinn er geggjaður, svaka stemning, það sést í dag og sést í öllum leikjum sem við erum að spila."
„Við erum að leggja okkur mikið fram. Stuðningurinn í stúkunni í dag var alveg til fyrirmyndar og ég er mjög þakklátur fyrir okkar stuðningsmenn í dag sem voru í raun bara tólfti maðurinn. Það er mjög gaman að vera í Val eins og staðan er núna. Við erum á góðu róli og erum að taka skref fram á við að koma aftur á þessar hæðir sem Valur á að vera á. Við ætlum að komast þangað, engin spurning."
Viðtalið má sjá í spilaranum í heild sinni hér fyrir ofan.
