Kristinn Steindórsson, leikmaður Breiðabliks, er með rifinn liðþófa. Þetta sagði Óskar Hrafn Þorvaldsson, þjálfari Breiðabliks, við Fótbolta.net í dag.
„Hann fór í myndatöku og í ljós kom að hann er með rifinn liðþófa. Kiddi fór í sprautu í morgun og við sjáum hvernig hann tekur við henni. Vonandi verður hann ekki lengi frá, en það er ómögulegt að segja," sagði Óskar þegar hann var spurður út í stöðuna á hópnum fyrir leikinn mikilvæga á fimmtudag.
„Hann fór í myndatöku og í ljós kom að hann er með rifinn liðþófa. Kiddi fór í sprautu í morgun og við sjáum hvernig hann tekur við henni. Vonandi verður hann ekki lengi frá, en það er ómögulegt að segja," sagði Óskar þegar hann var spurður út í stöðuna á hópnum fyrir leikinn mikilvæga á fimmtudag.
Kiddi fer í sprautu í þeirri von að hann geti eitthvað spilað á komandi vikum en Blikar vonast til þess að komast í riðlakeppni Sambandsdeildarinnar með sigri eða jafntefli gegn Struga á fimmtudag. Ef sigur vinnst þar þá á Breiðablik tólf leiki eftir á tímabilinu.
Kiddi þarf að hvíla eftir sprautuna og missir af leiknum á fimmtudag og leik Breiðabliks gegn FH á sunnudag í Bestu deildinni. Ef vel tekst til þá gæti hann hins vegar spilað eitthvað í kjölfarið.
Hann er 33 ára fjölhæfur leikmaður sem leyst hefur stöðu fremsta manns og einnig spilað úti vinstra megin á tímabilinu. Hann hefur komið við sögu í átta deildarleikjum í sumar og öllum Evrópuleikjunum til þessa. Hann hefur skorað eitt mark og lagt upp fjögur.
Leikurinn gegn Struga er seinni leikur liðsins í umspili um sæti í riðlakeppni Sambandsdeildarinnar. Breiðablik leiðir með einu marki eftir sigur síðasta fimmtudag í Norður-Makedóníu.
Flestir aðrir í leikmannahópi Breiðabliks eru klárir í slaginn. Patrik Johannesen er frá út tímabilið og þá er félagið að selja Ágúst Orra Þorsteinsson til Genoa á Ítalíu.
Athugasemdir
