Aron Birkir Stefánsson
„Ég er svekktur. Mér fannst við eiga vinna þennan leik," sagði Aron Birkir Stefánsson, markvörður Þórs, eftir jafntefli gegn Aftureldingu í dag.
Lestu um leikinn: Þór 1 - 1 Afturelding
Aron segir að Þórsarar hafi 'strögglað' til að byrja með í leiknum og leikurinn hafi verið svokallaður 'fifty-fifty' leikur í seinni hálfleik.
Afturelding fékk tvær vítaspyrnur í þessum leik. Fyrra vítið varði Aron Birkir: „Já ég var 100% [viss um að hann myndi skjóta í þetta horn]. Ég var búinn að lesa hann löngu áður."
Aron var svo dæmdur brotlegur þegar Jason Daði Svanþórsson féll í vítateig Þórsara. Hvað fannst Aroni um það atvik?
„Mér fannst það ekki vera víti. Mér fannst hann gera of mikið úr þessu en dómarinn dæmdi og við verðum að lifa með því." Snerti Aron Jason Daða? „Nei" Er þetta þá dýfa? „Í rauninni já."
Aron var þá spurður út í vítaspyrnuna sem Þórsarar fengu. Aron sagði að Alvaro hefði sagt við sig að hann hefði fundið snertingu og því farið niður. „Siggi dæmdi - við verðum að treysta dómaranum í þessu er það ekki?" sagði Aron og glotti.
Aron glímdi við við meiðsli síðasta vetur og í vor. Hvernig finnst honum eigin frammistaða verið í sumar?
„Mér fannst ég ekki byrja tímabilið nægilega vel. Kom til baka úr erfiðum meiðslum í vetur. Ég var aðeins meiddur þegar tímabilið byrjaði og er enn ekki 100%. Mér finnst hafa verið meiri stígandi í mínum leik í seinni umferðinni. Ég myndi segja að í dag sé ég svona 95%. Ég er með beinmar í hné og hef verið að spila á því - það er eitthvað sem maður spilar bara í gegnum," sagði Aron.
Viðtalið í heild sinni má sjá í spilaranum hér að ofan.
Athugasemdir
