Freyr Alexandersson
Römer fékk mikinn stuðning fra´stuðningsmönnum félagsins
Marcel Römer, fyrirliði danska félagsins Lyngby, fékk þær hörmulegu fréttir í lok febrúar að eiginkona hans væri látin, langt fyrir aldur fram, en Freyr Alexandersson, þjálfari Lyngby, ræðir um bræðralagið og hvernig hópurinn tókst á við þetta ásamt fyrirliðanum.
Lyngby tryggði sig upp í dönsku úrvalsdeildina fyrir rúmri viku eftir afar erfitt tímabil, bæði innan sem utan vallar.
Það var mikið um skakkaföll í hópnum og þurfti Freyr að takast á við það en ekkert gat undirbúið hann, hópinn og Römer fyrir það sem átti sér stað á miðju tímabili.
Eiginkona Römer lést skyndilega í lok febrúar, aðeins rúmu einu og hálfu ári eftir að þau giftu sig. Römer hefur fengið mikinn stuðning frá Frey, félaginu og liðsfélögunum í gegnum þessa erfiðu tíma.
Freyr ræddi við Fótbolta.net um tímabilið og hvernig leikmenn opnuðu og þjöppuðu sér saman. Römer snéri sjálfur aftur á völlinn í maí og hjálpaði liði sínu að komast aftur upp í efstu deild.
„Það er búið að ganga rosalega mikið á. Ég veit ekki hvort ég eigi að fara eitthvað mikið nánar út í það; innan vallar og utan, það voru vandamál sem við þurftum að takast á við. Það þétti okkur rosalega saman. Ég sá nýjar hliðar á fótboltanum í kjölfarið þar sem menn opnuðu sig á annan hátt. Það er mikið bræðralag í liðinu."
„Það er þeirra kredit. Ég reyndi að halda utan um þetta sem leiðtogi liðsins og stýra þessu í réttar áttir en í fyrsta lagi hvernig fyrirliðinn, Marcel, tókst á við sitt áfall og opnaði sig og við fengum hjálp við að takast á því við og ég mun aldrei upplifa þetta aftur, sem betur fer, því þetta var rosalega erfitt, en hvernig hann leiddi hópinn og við í sameiningu tókumst á við þetta, þaðer erfitt að lýsa þessu hvernig menn opnuðu sig og við þéttum okkur saman," sagði Freyr við Fótbolta.net.
Athugasemdir
