Championship: Luton hafði betur í Hull - Stjórinn nýrekinn

Luton Town gerði flotta hluti á síðustu leiktíð í Championship deildinni og ætlar sér aftur í umspilið í ár. Liðið hefur farið vel af stað og vann góðan sigur á Hull City í kvöld.

Luton tók forystuna snemma leiks þegar Alfie Jones setti boltann í eigið net. Henri Lansbury, fyrrum leikmaður Arsenal og Aston Villa, tvöfaldaði forystuna skömmu fyrir leikhlé.

Ekkert var skorað í síðari hálfleik þar sem heimamenn héldu boltanum vel innan liðsins en áttu í miklum erfiðleikum með að brjóta varnarmúr Luton á bak aftur. Gestirnir frá Luton beittu hættulegum skyndisóknum og verðskulduðu sigurinn. Hull átti ellefu marktilraunir en engin þeirra hæfði rammann.

Luton er með 16 stig eftir 11 umferðir á meðan Hull er aðeins með 11 stig eftir fimm tapleiki í röð.

Hull er án stjóra eftir að hafa rekið Shota Arveladze úr starfi í morgun.

Sjá einnig:
Hull rekur stjórann á leikdegi