„Við fengum tilboð í gær sem við höfnuðum. Í dag kom of gott tilboð til að hafna. Ljóst var að Sindri myndi nýta sér uppsagnarákvæði í haust og tókum við því tilboðinu," sagði Daníel Geir Moritz, formaður knattspyrnuráðs ÍBV, við Fótbolta.net.

„Sindri hefur staðið sig vel í ÍBV og þökkum við honum fyrir góða þjónustu og óskum við honum velfarnaðar á nýjum vettvangi."

Sindri Snær hefur leikið með ÍBV frá 2016 og hefur hann verið fyrirliði liðsins lengi vel.

Hann hefur einnig leikið með ÍR, Breiðablik, Selfossi og Keflavík á sínum leikmannaferli. Nú bætist ÍA við þann hóp.

ÍA er í þriðja sæti Pepsi Max-deildarinnar, en ÍBV er á botni deildarinnar í vondum málum.