„Þetta var mjög sárt, mjög sárt,“ sagði Lilja Dögg Valþórsdóttir, fyrirliði KR, eftir 2-0 tapið gegn Val í úrslitum Valitor-bikarsins.
Lestu um leikinn: KR 0 - 2 Valur
„Það var kannski einhver taugatitringur þarna í byrjun og því miður fáum við þetta mark á okkur snemma. En mér fannst við ná að vinna okkur fyllilega vel inn í þennan leik í fyrri hálfleiknum. Eins og ég er búin að segja hérna í öllum viðtölunum þá fannst mér eiginlega bara svekkjandi að fara inn í hálfleik því mér fannst við vera komnar á það gott skrið hérna í lok fyrri hálfleiks að mér fannst að við værum alveg að fara að setja á þær.“
„Það er vissulega bara svekkjandi að ná ekki að nýta þau færi sem við fengum. Við fengum nokkur dauðafæri. Svo náum við bara ekki sama dampi í seinni hálfleiknum, því miður.“
KR-liðið átti ágætis spretti undir lok fyrri hálfleiks og virtist allt eins líklegt til að jafna. Þegar komið var í síðari hálfleikinn náði KR-liðið þó ekki að fylgja frammistöðunni eftir og Lilja Dögg segist ekki vita af hverju það er.
„Ég hef ekki skýringu á því. Ég veit ekki hvað það er. Það var rætt um það inni í klefa að byrja seinni hálfleikinn eins og við enduðum þann fyrri en það fór ekki þannig. Því miður.“
