Gabriel gæti spilað á morgun - Arteta unnið að því að bæta hegðun sína

„Við æfum á eftir, ef hann klárar þá æfingu þá verður hann með í leiknum," segir Mikel Arteta, stjóri Arsenal.

Riccardo Calafiori og Martin Ödegaard eru báðir meiddir og verða ekki með. Calafiori verður væntanlega frá í nokkrar vikur en Ödegaard gæti snúið aftur fyrir landsleikjagluggann. Þá er Ben White tæpur fyrir leikinn á morgun.

Arsenal er fimm stigum á eftir toppliði Manchester City.

„Staðan í deildinni er snúin eftir níu leiki. Leikurinn á morgun gegn Newcastle verður erfiður, það verður mikil ákefð og ég er spenntur," segir Arteta.

Á fréttamannafundinum í morgun sagði Arteta að hann væri að reyna að bæta hegðun sína á hliðarlínunni og hemja tilfinningar sínar. Hann er líflegur í boðvangnum en þykir oft fara yfir strikið.

„Ég hef reynt að aðlaga mig til að fara eftir reglum. Það er ekki orðið þannig að ég er bara í hugleiðslu á hliðarlínunni. Ég vil ekki fara í bann og missa af leikjum. Ég get ekki lofað því að ég muni ekki hoppa og hlaupa um þegar við skorum," segir Arteta.