Leitað eftir stuðningi við að kosta myndina
Sölvi Tryggvason tekur viðtal.
Það er klárt mál að þú færð gæsahúð þegar þú horfir á stikluna hér að ofan en hún er úr væntanlegri heimildarmynd um landsliðið sem Sölvi Tryggvason og Sævar Guðmundsson hafa unnið að. Hér að neðan má sjá tilkynningu frá Sölva.
Eins og flestir vita er íslenska landsliðið nú nær því en nokkru sinni í sögunni að komast á lokakeppni stórmóts í knattspyrnu og yrði ef það tækist fámennasta þjóð sögunnar til að afreka slíkt. Við Sævar Guðmundsson leikstjóri höfum fylgt liðinu eftir í gegnum alla undankeppni EM 2016 úr meira návígi en nokkru sinni hefur þekkst. Myndin mun því sýna störf leikmanna, þjálfara og annarra starfsmanna landsliðsins í algjörlega nýju ljósi og stiklan gefur örlitla innsýn inn í það myndefni sem við höfum þegar tekið. Þar gefur til að mynda að líta myndefni að tjaldabaki úr sjúkraherbergjum, af liðsfundum, æfingum, úr liðsrútu, hóteli og úr búningsklefa eftir leiki.
Verkefnið er kostnaðarsamt og Kvikmyndasjóður hefur enn ekki séð sér fært að veita því stuðning. Til þess að þessi mynd um einstaka atburði í íslenskri íþróttasögu geti orðið að veruleika reiðum við okkur á stuðning landsmanna. Samhliða stiklunni förum við því af stað með söfnun á Karolinafund, eins og sjá má hér að neðan.
Hlekkur á söfnunina
Athugasemdir
