Besta deildin: Mark dæmt af í blálokin í Kópavogi

Það var spennandi leikur á Kópavogsvelli í dag þar sem KA heimsótti Breiðablik. Heimamenn gátu komist á toppinn um stund að minnsta kosti með sigri og þá gat KA rifið sig aðeins frá fallbaráttunni.

Mikael Breki Þórðarson fékk tækifæri í byrjunarliðinu hjá KA í dag og hann nýtti tækifærið snemma leiks þegar hann skoraði sitt fyrsta mark á tímabilinu.

Breiðablik náði góðum tökum á leiknum í kjölfarið og Damir Muminovic og Höskuldur Gunnlaugsson fengu tækifæri til að skora. Breiðablik vildi vítaspyrnu þegar Tobias Thomsen féll í teignum en ekkert dæmt.

Stuttu síðar fékk Breiðablik síðan vítaspyrnu þegar brotið var á Óla Val Ómarssyni. Höskuldur steig á punktinn og skoraði af öryggi.

Seinni hálfleikurinn var tíðindalítill en það dró svo sannarlega til tíðinda í blálokin. Tobias Thomsen átti skot og boltinn fór af Viktori Erni Margeirssyni og í markið. Það var hins vegar dæmt af þar sem boltinn virtist fara í höndina á Viktori.

Breiðabliki mistekst því að komast á toppinn. Liðið er með 32 stig í 2. sæti, stigi á eftir Val og stigi á undan Víkingi en bæði lið eiga leik til góða. KA fer upp um eitt sæti, upp í 9. sæti með 19 stig.