Brynjar Hlöðversson, miðjumaður Leiknis, kom sterkur inn af bekknum í sínum fyrsta leik eftir að hafa farið í aðgerð vegna kviðslits þegar Breiðholtsliðið vann KR í vítaspyrnukeppni í undanúrslitum Reykjavíkurmótsins í fótbolta í gær.
Í spilaranum hér að ofan má sjá viðtal við Brynjar eftir leikinn en staðan var 2-2 að loknum venjulegum leiktíma. Brynjar þurfti ekki að taka víti í vítaspyrnukeppninni.
„Ég var vítaspyrna númer sex en ég tók síðast víti í sjöunda flokki minnir mig. Það voru ýmsar hugsanir sem flugu í gegnum hausinn en sem betur fer kláruðu þeir þetta," sagði Brynjar eftir leik.
Leiknir mætir Val í úrslitaleik á mánudag.
„Við unnum þá í riðlinum og getum unnið þá aftur. Ég hlakka til að mæta þeim. Við förum svo beinustu leið í sund en veljum kannski aðra sundlaug núna, ég held að Breiðholtslaugin verði vöktuð."
Viðtalið má sjá í heild sinni í sjónvarpinu hér að ofan.
