England: Loksins kom sigur hjá Southampton

Annar leikur dagsins í ensku úrvalsdeildinni var viðureign Sheffield United og Southampton.

Fyrir leikinn í dag á Bramall Lane höfðu gestirnir frá Southampton ekki unnið í síðustu níu deildarleikjum. Átta af þeim höfðu tapast og eitt jafnteflið litið dagsins ljós.

Það breyttist í dag og vann liðið nokkuð þægilegan sigur á botnliði Sheffield. Gestirnir byrjuðu betur í dag og áttu nokkra ágætis sénsa. Á 32. mínútu var hins vegar brotið á Nathan Tella og vítaspyrna réttilega dæmd.

Á punktinn steig fyrirliðinn sjálfur James Ward-Prowse og skoraði hann af miklu öryggi. Southampton hóf síðari hálfleikinn af krafti og á 49. mínútu skoraði Che Adams glæsilegt mark. Hann þrumaði þá knettinum upp í nær hornið eftir að Stuart Armstrong lagði boltann á hann með brjóstkassanum.

Sheffield reyndi hvað það gat til að koma sér inn í leikinn en það gekk ekki eftir. Takumi Minamino fékk dauðafæri til að skora þriðja mark Southampton en skotið hans fór rétt framhjá markinu.

Lokatölur 0-2 og langþráður sigur Southampton í höfn. Slæmu fréttirnar fyrir þá eru þær að Danny Ings þurfti að fara snemma af velli vegna meiðsla.

Liðið er núna í fjórtánda sæti deildarinnar, tíu stigum frá falli. Sheffield situr sem fyrr á botni deildarinnar.