Þýskaland um helgina - Freiburg vill Meistaradeildina

Arminia heimsækir nýliða Bochum sem eru með öruggt sæti í deildinni á næstu leiktíð. Sigur myndi fleyta liðinu uppfyrir Stuttgart og í umspilssæti sem gefur þátttökurétt í umspilsleik við þriðja sæti B-deildarinnar um síðasta lausa sætið í efstu deild. 

Stuttgart mætir ekki til leiks fyrr en á sunnudaginn og þá gegn FC Bayern sem er búið að vinna sinn tíunda Þýskalandsmeistaratitil í röð.

Þá er enn hörð barátta um hin ýmsu Evrópusæti. Union Berlin er aðeins einu stigi frá Köln í Evrópusæti en á erfiðan útileik gegn Freiburg á morgun. Freiburg er í fjórða sæti sem stendur, einu stigi fyrir ofan Leipzig, og stefnir á að taka þátt í Meistaradeildinni í haust. Köln tekur á móti Wolfsburg og þarf sigur þar í Evrópubaráttunni hörðu.

Leipzig, sem tapaði óvænt undanúrslitaleik Evrópudeildarinnar gegn Rangers í gær, tekur á móti Alfreði Finnbogasyni og félögum í Augsburg sem eru svo gott sem búnir að bjarga sér frá falli. Sá leikur fer fram á sunnudaginn.

Að lokum nægir Hertha Berlin að sigra gegn Mainz til að bjarga sér frá falli.

Föstudagur:
18:30 Bochum - Arminia Bielefeld

Laugardagur:
13:30 Freiburg - Union Berlin
13:30 Hoffenheim - Leverkusen
13:30 Köln - Wolfsburg
13:30 Greuther Furth - Dortmund
16:30 Hertha - Mainz

Sunnudagur:
13:30 Eintracht Frankfurt - Gladbach
15:30 Bayern - Stuttgart
17:30 RB Leipzig - Augsburg