Everton - Liverpool frestað vegna veðurs

Afleitt veður verður víða um Bretlandseyjar í dag og búið að fresta ýmsum leikjum. Þar á meðal er grannaslagur Everton og Liverpool sem átti að vera í hádeginu.

Leiknum var frestað eftir að fulltrúar frá félögunum höfðu fundað með lögreglunni og borgaryfirvöldum.

Þegar þessi frétt er skrifuð þá er það eini úrvalsdeildarleikurinn sem hefur verið frestað en tveimur leikjum í Championship-deildinni hefur verið frestað; Cardiff - Watford og Plymouth - Oxford. Þá er búið að fresta C-deildarleik Bristol Rovers og Bolton.

Stormurinn Darragh gengur yfir og gul viðvörun var gefin út á Merseyside í morgun. Var í kjölfarið tekin sú ákvörðun að fresta leik Everton og Liverpool en það verður síðasta viðureign liðanna á hinum klassíska Goodison Park.

Heimili á vesturhluta Englands og í Wales eru mörg hver án rafmagns vegna óveðursins.

Leikir dagsins í ensku úrvalsdeildinni
15:00 Aston Villa - Southampton
15:00 Brentford - Newcastle
15:00 Crystal Palace - Man City
17:30 Man Utd - Nott. Forest