Trausti í leik með Þrótti í Laugardalnum.
„Þetta er dagur sem maður gleymir ekki," sagði Trausti Sigurbjörnsson, markvörður Þróttar, í útvarpsþættinum Fótbolti.net á X-inu FM 97,7 síðasta laugardag. Þróttur innsiglaði sæti í Pepsi-deildinni í lokaumferð 1. deildarinnar en á lokahófinu um kvöldið bar hann svo upp bónorð til kærustu sinnar
„Þetta var mjög skemmtilegur dagur og í ógeðslega vondu veðri og rigningu kláruðum við þetta á Valbirni og það var bara geggjað," sagði Trausti.
„Þetta hefur verið þokkalega góð vika. Ég var búinn að leita eftir tækifæri til að biðja kærustunnar og hvað er betra tækifæri en þetta. Við að komast upp í Pepsi, fórum á lokahóf og ég smellti mér upp á svið og bað hennar fyrir framan 150 manns í Þróttaraheimilinu."
Trausti fékk að sjálfsögðu já en hann viðurkennir að hafa íhugað að biðja kærustunnar í miðjum leik.
Trausti átti frábært sumar og var valinn besti markvörður 1. deildarinnar í sumar. Þróttarar eru fullir tilhlökkunar fyrir komandi verkefni.
„Við höfum fengið að vita það frá Gregg að það verða fengnir leikmenn og einhverjir sem detta út. Það er bara eins og gengur og gerist milli tímabila. Kjarninn í hópnum er orðinn vel slípaður saman og flottur ef við bætum við okkur nokkrum hágæða leikmönnum getum við gert góða hluti," sagði Trausti sem var beðinn um að lýsa þjálfara Þróttar, Englendingnum unga Gregg Ryder.
„Gregg er með hrikalega mikið sjálfstraust og ávinnur sér virðingu hvert sem hann fer. Hann sýnir leikmönnum hrikalega mila virðingu og fær hana þar af leiðandi á móti. Þú getur alltaf leitað til hans og treyst honum fyrir flestu."
Viðtalið má heyra í heild í spilaranum hér að ofan. Þar tjáir Trausti sig nánar um Gregg, heimavöll Þróttar, spennandi leikmenn liðsins og ferð sína til Liverpool.
