Rooney er markahæsti leikmaður bæði United og enska landsliðsins frá upphafi en hann stýrir nú Derby í ensku B-deildinni.

Hann er afar spenntur fyrir United á þessari leiktíð og þá sérstaklega eftir að Cristiano Ronaldo samdi við félagið á lokadegi gluggans.

„Hvaða áhrif mun Ronaldo hafa á liðið? Gríðarlega mikil. Hann er ennþá einn af bestu leikmönnum heims," sagði Rooney við talkSport.

„Við sáum það í leiknum gegn Írlandi á dögunum hvað hann er fær um að gera. Hann skoraði tvö geggjuð skallamörk á lokamínútunum þannig hann getur haft mikil áhrif."

„United er loksins tilbúið í að berjast um titilinn og þeir verða að gera það á þessu ári. Ronaldo verður mikilvægur og mun eiga stór augnablik á þessu tímabili. Hann mun pottþétt skora mikið af mörkum."

Rooney fylgist vel með United og telur að Cristiano komi til með að hafa umtalsverð áhrif á yngri leikmenn félagsins.

„Ég fylgist með Man Utd. Ég vil að þeim gangi vel og það er frábært að félagið hafi fengið Cristiano aftur. Hugarfar hans mun smitast í yngri leikmennina, þannig þetta er frábær tímasetning."

„Cristiano veit það sjálfur að þetta verður ekki einfalt eða eins auðvelt og þetta var á Spáni og Ítalíu. Þetta er sterk deild og hann veit það. Hann verður vel undirbúinn og klár í að skora aftur mörk fyrir United," sagði hann í lokin.