Þýskaland: Bayern missteig sig - Leipzig fór illa með Dortmund

Bayern Munchen missteig sig gegn Stuttgart á heimavelli í dag. Mathys Tel kom Bayern yfir en hann varð um leið yngsti markaskorarinn í sögu Bayern í deildarkeppni. 

Gestirnir frá Stuttgart jöfnuðu en Jamal Musiala kom heimamönnum yfir á 60. mínútu með mjög smekklegu marki.

Stuttgart fékk hins vegar vítaspyrnu í uppbótartímanum og var það Sehrou Guirassy sem var með stáltaugarnar en hann skoraði og tryggði Stuttgart frábært stig.

Þá mættust RB Leipzig og Dortmund en fyrir leikinn var Dortmund í öðru sætinu. Þeir gulklæddu fengu skell í dag en Leipzig vann leikinn með þremur mörkum gegn engu.

Ungverjinn Dominik Szoboszlai skoraði eitt marka Leipzig en það var einstaklega glæsilegt. Hann þrumaði þá knettinum í netið með frábæru skoti fyrir utan teig.

Hoffenheim vann þá 4-1 sigur á tíu leikmönnum Mainz, Hertha og Bayer Leverkusen gerðu 2-2 jafntefli og Wolfsburg vann Frankfurt á útivelli.

Í kvöld mætast Schalke og Bochum en á morgun getur Freiburg farið aftur í efsta sætið en liðið mætir þá Mönchengladbach.

Úrslitin, markaskorara og stöðuna í deildinni má sjá hér fyrir neðan.

Bayern 2 - 2 Stuttgart
1-0 Mathys Tel ('36 )
1-1 Chris Fuhrich ('57 )
2-1 Jamal Musiala ('60 )
2-2 Sehrou Guirassy ('90)

RB Leipzig 3 - 0 Borussia D.
1-0 Willi Orban ('6 )
2-0 Dominik Szoboszlai ('45 )
3-0 Amadou Haidara ('84 )

Hoffenheim 4 - 1 Mainz
0-0 Andrej Kramaric ('44 , Misnotað víti)
1-0 Andrej Kramaric ('53 )
2-0 Grischa Promel ('69 )
3-0 Munas Dabbur ('80 )
3-1 Dominik Kohr ('83 )
4-1 Pavel Kadeřábek ('90)
Rautt spjald: Alexander Hack, Mainz ('41)

Eintracht Frankfurt 0 - 1 Wolfsburg
0-1 Maxence Lacroix ('60 )

Hertha 2 - 2 Bayer
0-1 Kerem Demirbay ('49 )
1-1 Suat Serdar ('55 )
2-1 Marco Richter ('74 )
2-2 Patrik Schick ('79 )